Nyadi hari siti dia Pelanduk bejalai ngagai Tekura. Lebuh Pelanduk seduai Tekura bejaku enggau pangan diri, seduai enda nyebut nama pangan diri, tang semina nganggauka pangan diri ngena nama emperian seduai. Nyadi emperian seduai nya ‘ Sambe’. Datai Pelanduk ba kaki tangga Tekura dia iya lalu nganggau ka Tekura, ku iya,
Ni nuan Sambe, bisi dirumah nuan ?
Oi Sambe’, tu aku di rumah tu. Ku saut Tekura.
Jadi rumah nuan Sambe, tau lalu niki aku ?, ku Pelanduk nanya Tekura.
Tau Sambe’, lalu meh. Rumah pandak enggi aku tu Sambe’ nadai da entakka rembak pagar api,
Rumah panjai enggi aku tu Sambe’ nadai entakka tambai penti pemali. Ku Tekura.
Ninga rumah Tekura nadai pemali, dia Pelanduk lalu niki ngagai rumah Tekura.
Lalu Sambe’ , duduk. Ku Pelanduk.
Au, meh Sambe. Ku Pelanduk.
Lama endar nuan nadai nemuai ngagai aku Sambe’, nama pejalai nuan deh Sambe’ ? Ku Tekura.
Nya meh Sambe’, nadai hari nemuai aku Sambe’ laban yti kiruh ngatur pechara Rusa seduai Rimau. Tu aku ti nemuai ngagai nuan laban meda hari tu udah lama kemarau, lalu ai sebelah sungai dalam kampung tentu udah langkang bendar. Aku ensepi diri nadai utaika lauk ngelamatu, nya alai tu berunding mai nuan nubai, enti nuan bisi hari meh Sambe’. Pia ku Pelanduk.
Manah endar, pejalai nuan Sambe’. Enti munyi nya pagila tua sama ngali urat tubai, lusa mupuk meh tua nurun nubai enti nadai utai nanggul agi. Ku Tekura.
Ngena nya Sambe’, nuan ngali urat tubai ka dikena tua nubai, aku ngaduka tajuk perau ka tua. Pia ku Pelanduk.
Au meh. Ku Tekura.
Enti pia mupuk dulu aku Sambe’, aku lalu terus deka ngaduka tajuk perau lagi, ku Pelanduk.
Barang iya, aku pia ga lalu terus mupuk ngali urat tubai ga, enti kira apin chukup pagila lalu terus ngali baru ga. Ku Tekura.
Pelanduk lalu mupuk mulaika diri ngagai rumah iya. Datai iya di rumah iya lalu nangkin duku, mai beliung sereta enggau keruin dikena iya makal perau. Pagi siti Pelanduk agi ngaduka tajuk perau iya, laban tajuk perau ti apin tembu digaga iya. Tudah Tekura baka nya ga ngali urat tubai.
Pagi siti, udah semua utai chukup dibai Pelanduk seduai Tekura, udah disimpan seduai dalam perau, seduai lalu mupuk merau ngilika Sungai Ketunggau. Apin bengat lama udah seduai ti merau lalu datai ba endur siti, dia seduai bisi ninga orang nganggau.
Oi, kini seduai Sambe’ ? ku nyawa orang ti nganggau.
Dek a nubai kami duai Sambe’ tu, Ku saut Pelanduk. Peda orang ti nganggau nya Kijang.
Aku enggau Sambe’, ku Kijang.
Enggau ga, dua nyadi tiga. Ku Tekura.
Udah tudah kijang nepanka dalam perau, mupuk ga sida tiga merau ngilika Sungai Ketunggau.
Enda lama udah nya, dinga sida tiga bisi ga orang nganggau, ti madahka deka enggau nubai. Bai sida tiga ga. Tiga nyadi empat ku Tekura. Bakanya beari-ari bala jelu bukai betambah-tambah mayuh enggau Pelanduk seduai Tekura nubai. Nyadi nyau kelama mansang mayuh semayuh bala jelu bukai sama enggau Pelanduk seduai Tekura udah nepan dalam prau sida sama bla deka enggau nubai. Apin lama sida udah merau nya baru sida datai ba nanga Sungai Ketunggau, sida lalu mudik sungai nya. Laban hari ti lama udah kemarau, nya alai ai Sungai Ketunggau langkang bendar, bisi ba skeda lansar ai nyau putus, ikan di peda sida mega nyau bekekechit, nya pemayuh munyi tangkap ikan ti besai-besai di dinda sida.
“Ditu sangkai kitai Sambe’, ku Pelanduk. Ditu kitai ngaga palan.”
“Sebarang ia, ditu manah meh, ba emperan ba pala lubuk tu, ku saut bala jelu bukai.
Bala jelu lalu bebantaika semua perengka ti dibai sida, dibantai sida ke tebing. Udah tembu bebbantaika semua barang, sida lalu bla begigaka kayu, daun tepus panyun enggau daun bukai ti dikena sida ngaga atap dunju ti endur sida ngenduhka diri skumbang sida ti berikan nya. Udah tembu ngaga dunju, sida terus kiruh nyumai, laban hari nyau deka lemai. Udah badu sida makai, dia sida tumu tinduk laban ti udah lelak bekauh sereta lelak mega udah ngaga dunju.
Tumu pagi siti, udah tembu makai pagi, bala jelu lalu mai urat tubai ngagai sungai Ketunggau. Bisi sida ti malu urat tubai dalam perau, udah abis urat tubai abis dipalu, sida lalu ngaramka ai tubai ba lubuk. Udah sida ngaramka ai tubai, sida lalu beribun. Lebuh sida ti beribun dia sida meda mayuh bendar ikan bekekechit mabuk laban ai tubai, enda lama udah nya bala jelu lalu berengkah ngarang ikan. Bekarangka ikan sida sehari-hari nya, ikan mayuh bendar ulih sida nubai. Hari pen nyau deka lemai, sida lalu bepai pulai ngagai dunju sida. Bansa ikan ti ulih sida sehari nya nyengkaum tapah, kedebu, tuman, runtu, semah, takam, enggau ikan ti bukai. Semua ikan ti mit baka banta, banggah, buing diperauk sida ngena garam digagaka pekasam. Sereta datai sida ba dunju, dia sebarang sida ti nyumai lalu menyadika api sereta mela ikan ka lauk sida makai malam nya. Sida ke bukai ngiga kayu ti rangkai awakka bisi dikena sida nyalai ikan, bisi skeda sida ngaga para endur ngengkahka ikan ti disalai. Malam nya enda berapa tindu sida laban nyaga salai enggaika angus empa api.
Udah tawas hari, tumu sida besikap deka bekarangka ikan.
Ku Pelanduk, “ seduai Gajah enggau Babi Bandan, tinggal enda ibuh enggau kami bekarang sehari tu, seduai ngibun salai kitai, enti nadai kitai ngintu enggaika para ti endur nyalai ikan nyau angus, tauka enggaika orang bisi datai lalu menchuri ikan ti benung disalai, rugi endar kitai.
Pia meh sambe’, nadai orang beanika kami duai, enti sema bisi orang datai deka menchuri salai ikan kitai, ku sabut Gajah seduai Babi Bandam.
Bala jelu bukai lalu mupuk bekarang baru, sehari-hari nya sida bekarang, lalu ikan mayuh endar ulih sida.
Nyadi Gajah seduai Babi Bandam ti ngibun salai mega kiruh, nyaga api enggaika api klalu mau lalu nganguska para, sebarang ikan ti udah rangkai lalu diengkah seduai ba para ti endang digagaka endur ngengkah ikan ti udah disalai. Ikan ti apin chukup rangkai lalu dikalih seduai.
Kira hari nyau maya matahari tenggahari dara, dia seduai bisi nyawa utai bemunyi, ku munyi nyawa utai nya, Ha! Ha! Ha!, Tum Tum Temba Indai Lagum nadai dia udah mansai Sungai Kar, iya ke dulu aku ema iya ke dudi aku empa. Selalu munyi nya munyi nyawa utai ti didinga seduai, makin lama makin semak. Nyau kepuas peda seduai utai ti bemunyi nya tak rembus ba endur Gajah seduai Babi Bandan ti ngibun salai ba dunju palan sida ti nubai. Angkat meh Gajah tak lalu belanda rari ninggalka Babi Bandam, meda bekenya angkat alalu belanda ga Babi Bandam rari nitihka Gajah. Seduai ti rari nya enda beapai enda beindai, kaki dulu kaki asur, pala dulu pala ga asur nyau terap tetingkap.
Nyadi tinggal Gajah seduai Babi Bandam ti rari ninggalka salai sida, dia utai ti rembus ba seduai nya tadi deh Antu Raya, datai kia laban ensium bau salai ikan. Antu Raya nya enda chamang lalu makai kengka salai ti bisi ba atas para, abis salai nya Antu Raya mulaika diri.
Nyau hari udah lemai bala jelu ti ngarang ikan ti udah ditubai sida mega mulaika diri ngaga dunju palan sida. Datai sida ba palan sida, meda salai nyau abis lengis. Sida nganggauka Gajah seduai Babi Bandam laban sida nadai nemu seduai nguan dunju sida. Skeda sida bejaku madahka salai ikan nya abis diempa Gajah seduai Babi Bandam’ Nyau puas bala jelu ngagnggauka seduai nya baru seduai mansutka diri ari teluk bandir.
Meda seduai udah mansutka diri ari babas, bala jelu nyau bejelabut nganu seduai ngumbai seduai bengat baam makai ngulam abis salai ikan. Tang ku seduai nyaut ngena insak ngena sabak;
Nadai kami duai Sambe’ makai salai deh, tak baru tembu mantaika ikan ti udah mansau, dia kami duai ninga nyawa orang nyebut, “ Ha! Ha! Ha!,Tum, Tum, Tumba, Indai Lagum nadai dia udah mansai Sungai Kara, iya ke dulu aku ema iya ke dudi aku empa”. “Udah nya orang nya lalu rembus ba palan kitai tu, gamal orang besai tinggi lalu pala iya belunchun baka rintung, mata iya mirah mesai buah terung, lenggan iya begeran baka pemalu tekalung, betis mesai sintung sereta panjai baka tugal kurung. Ninga iya deka makai kami duai Sambe’, kami duai lalu rari nadai bepadahka pangan diri. Peda patung, siku kami duai abis mensul, bakal bai kami duai ti rari enda beapai enda beindai, ngidupka nyawa diri.”
“Eh ! anang ngemulaka kami seduai, dini nemu bisi antu di menua tu, nama kami nadai ninga nyawa antu nya”, ku bala jelu.
“Anang bekelikuh agi, lelak magang kitai tu, perut ga lapar asai ke dikeruk, aram sama manggaika ikan ngagai atas para bala kitai. Skeda kitai nyumai sereta ngasam ikan ke mit-mit.”
Bala jelu lalu bekisuh besalaika ikan, bisi ke engkasam ikan kemit, bisi ke berapi. Udah tembu makai, udah abis ikan dipanggaika sida ngagai para. Sida ke bukai tinduk magang, tumu sida tinduk laban ti lelak udah bekarangka ikan, tang Gajah seduai Babi Bandam enda diasuh sida bukai tinduk laban diasuh sida ngibun salai semalam-malam nya.
Pagi siti udah sida makai pagi, udah tembu bekemaska semua perengka ti dikena bekarang, bala jelu lalu betanyaka pangan diri, nanyaka sapa bagi sida ti ngibun salai sehari nya, mayuh endar bala sida madahka diri enggai laban takutka Antu Raya ti datai baru. Udah nya nyaut Rusa seduai mayas,
Ku rusa, “seharitu awakaka kami duai Sambe’ ti bebaju kanggan nya ngibun salai.”
“Sebarang ia meh Sambe’, aku tu tak semai enti sema Antu Raya datai lagi, nadai nya bengat pedis ngelaban iya deh, rinkang endar tanduk Sambe’ Rusa nya, nyamai dikena iya nyakang-nyakang sereta ngachuk mata Antu Raya, lenggan aku tu ganggam ga dikena aku merekuhka iya, deh aku ke nguyaska dan tapang”. Pia ku chakap Mayas dikena iya meransang ati sereta muji diri ba mua bala jelu ke bukai. Nyadi Rusa nadai bemunyi semina nyanggup diri deka, deka iya madahka diri enggai enggau Mayas sanggup ngibun salai laban iya malu madahka diri buyan ba tugging bala jelu.
Ninga Rusa seduai Mayas sanggup ngibun salai sida sehari nya, dia bala jelu ke bukai lalu mupuk ga mansang bekarang tungaka ili Sungai Ketunggau. Datai sida ba Sungai Ketunggau, peda sida ikan mayuh endar udah mati mabuk laban ai tubai, bala jelu lalu berengkah bekarang.
Nyadi Rusa seduai Mayas ti tinggal ngibun salai sida, kiruh endar ga ngibun api sereta ngambi kayu. Hari tak manah enda sehari nya, rebut deras ga nadai trentu kiruh betiupka api, semina seduai nyurungka kayu sereta ngerara api awakka api nya tak pemanah iya lalu enda nganguska para salai sida.
Kira maya hari nyau tenggan ngalih, dinga seduai kayu nyau bekeserum rebah munyi ti dipangkaka kabut. Rusa seduai Mayas sama beperening pangan diri, ati seduai berasai takut.
“ Bah, nama hari tu tak kabut, tang hari tak nadai bemua ?” pia ku Mayas nanya Rusa.
“Enda nemu Sambe’, kada enda Antu Raya nya mansang ngagai tua kitu”, ku Mayas.
“Tua anang rari ninggalka pangan diri, enti tua ngelaban sama besaup ngelaban, enti rari tua sama bebai”, pia ku Rusa.
“ Pia meh Sambe’, enti gamal Antu Raya tak enda bengat besai, awakka aku dulu belabuh jari, semadi enda alah diperekuhka aku, nya baru nuan ngachuk mata iya ngena tanduk nuan.” Pia ku Mayas.
Dinga sedua kayu ti bekeserum tak mansang semak-semak, udah nya seduai lalu ninga munyi nyawa antu nya, “ Tum Tum Tumba Indai lagu nadai dia, udah mansai sungai kara, iya ke dulu aku empa iya ke dudi aku ma”. Lama agi mansang semak agi ga munyi nyawa antu nya endang tak mansang ngagai endur Rusa seduai Mayas ti ngibun salai. Enda bengat lama iga, peda tak rembus ba semak para salai. Gamal Antu Raya nya besai tinggi, pala iya belunchum baka rintung,mata iya mirah mesai terung kanggan, lenggan iya begeran bala pemalu tekalung, betis iya mesai sintung. Tak tekenyit meh Rusa lalu engkechit belanda rari ninggalka Mayas.
Mayas laban ti agi kiruh nyurungka kayu ngagai api ti ba baruh para salai, benung iya agi ragang-ragang lalu tekenyit ensepi diri udah ditangkap sereta diperekuhka Antu Raya ba punggung. Nya meh Mayas tak naka ulih deka ngelepaska diri ari perekuh Antu Raya, tang lalu enda ulih, lama ga seduai iya beinas-inas, tang perekuh Antu Raya lalu mengkang nganchin ba punggung Mayas. Nya kelama Mayas nya lembut tulang sereta pegari kemi pegari tai, berasai sendat seput ti ngujungka Mayas lalu terus luput. Udah Mayas luput nya baru Antu Raya ngelengkaka iya, benung Mayas ti luput dia Antu Raya tak majakka diri makai salai. Nyau kelama nya baru Mayas ngeleda luput, enchelak iya meda Antu Raya benung bekesingam makai salai. Mayas angkat begadai-gadai lalu terus belanda ngebuka diri rari tang Antu Raya nadai ibuhka iya semina ngeringak majakka diri makai salai. Nama deh tak enda lama Antu Raya makai salai alai semua salai pan abis ga diempa iya, udah abis salai dia Antu Raya mulaika diri ga.
Hari nyau lemai sereta umbas endur bala jelu pulai bekarang, sida mulaika diri. Datai sida ba langkau palan, peda salai tak udah abis, Rusa seduai Mayas nadai ditemu sida ngibun salai. Meda seduai nadai dia, bala jelu lalu bekeranggau nganggauka seduai, nyau kepuas ninga bala jelu ti bekerauh nganggauka seduai nya baru Rusa dulu chunggap-chunggap mansutka diri ari teluk bandir ti endur iya engketut balalaika Antu Raya. Udah nya baru peda pansut ga Mayas bejalai nyau besingka-anggung tak semina dapat bejalai.
“ Nya gamal seduai, udah abis salai diempa seduai lalu tinduk melukka diri ba bandir, nyau enda dapat bejalai mai perut seduai ti kenyang udah makai salai, iga sedua bengat enda kasihka kami ti lelak bekarang sehari-hari tu,” pia ku jaku bala jelu nganu Rusa seduai Mayas.
“ Akai-rai sambe’, tak seumur idup kenyau ari aku udah ada ari perut indai, tak baru seharitu meh ensepi nyawa nyau deka mati,” pia ku Mayas.
“Aku pia meh sambe’, mimit agi mati aku tadi, nyau bebendar aku ngulihka diri laban tanduk aku ti disintak panjuk wi gelung rutan lebuh aku ti rari tadi, deka ngidupka nyawa,” pia ku Rusa.
“Endai, nama utai di kerarika seduai deh,” pia ku tanya bala jelu.
“Akai rai sambe, tak kenyau ari aku ada suba, tak enda kala aku mega gamal antu ngemesai nya, gamal iya besai tinggi, pala belunchum baka rintung, lenggan begeran bala pemalu tekalung, betis iya mesai sintung panjai baka tugal kurung. Antu nya bejalai sipa-sipa lalu ku jaku iya, “Ha! Ha! Ha! Tum, Tum, Tumba Indai Lagun nadai dia udah mansai Sungai Kara, iya ke dulu sku empas, iya ke dudi aku ema,”. Aku nyau pegari kemi pegari tai, nyau ka mati diperekuhka iya, nakaka pemedis-medis aku diinsah Antu Raya”, pia ku Mayas.
“Nye! Jera asai seduai, lemai kamari ukai main-main pemalat jaku seduai madahka kami duai Sambe’ bula sereta buyan”, pia ku Babi Bandam, “nya nadai ga penungga seduai ti madahka diri kering sereta berani”.
“Eh, anang kiiruh mendingka cherita bula seduai nya kitai,badu bekelikuhka jaku, aram panggaika ikan kitai ka atas para, kita ti enda tukang masak, berapika kitai, nyau geriuk perau tu lapar ba bekarang sehari tu tadi,” pia ku pelanduk, ngerah bala jelu. Bala jelu lalu bekekisuh, bisi sida manggaika ikan ka atas para, bisi ngasam ikan ke mit lalu bala tukang masak lalu nyumai asi enggau ikan ka lauk sida lemai nya. Udah badu makai, sida enda belemai laban ti lelak uah bekarangka ikan, tumu sida tinduk, tang Rusa seduai Mayas diukum sida enda diasuh tinduk tang diasuh ngibun salai enggaika api kelalu mau lalu nganguska ikan ti benung disalai.
Tinduk meh bala jelu, mejamka kemunuk mata tisi, udah nya unding beliung unding hari pan besiring teringkas tawas, sandah nyau bekedurau da tanah matah ladu, dinga empeliau nyau beteranggau nguuk da randau kubal tusu. Bala jelu bela ensugau ga ngesaika peninduk diriempu. Bala tukang masak lalu nyumai surung kaki engkajat baka ke sengat semada, surung jari naka penyampat baka ke muar kesa, asap melap ngemuchuk randau asai mansau, tanggung asi ari ringgung lalu disungkit beselapka daun biru. Peda pemayuh asi enggau lauk nyau bedunjung ba peninggi Bukit Santubong, keba Bukit Santubong sigi begamal renjung-renjung sepiak entap sepiak merabung, lemai pandai bedunggai, pagi menyanyi lagu kerunchung. Tiap lemai genap pagi tigung dayung tungkang bekejang.
Nyau ketiga, keempat hari, lalu ba hari ti kelima, tumu pagi siti sereta udah badu makai pagi udah bekemaska semua perengka ti dikena sida bekarang bala jelu lalu deka mupuk bekarang baru, tang sebedau sida mupuk sida betanyaka pangan diri, nanyaka sapa bagi ti deka ngibun salai sehari nya.
“Awakka kami duai sambe’ tu”, ku saut tudah Tekura.
“Hi, gamal seduai ngemaranika diri, seduai sambe’ Tukura enggau Pelanduk nya lagi enda umbas sekali Antu Raya nyuap”, ku Mayas.
“Anang mayuh jaku agi, seduai ga udah sanggup, sebarang baka iya meh. Mupuk kitai nyau tinggi setinggi hari tu”, ku jaku balaa jelu bukai.
Bala jelu ti bekarang nya ba Sungai Tekunggau tunga kilika agi nampung endur sida ti dulu ba hari ti kempat kamari. Sida bulih endar bekarang sehari nya, ikan ti besai-besai baka tapah, semah, empurau enggau ikan bukai mayuh endar ulih sida. Kira maya tenggah hari, udah badu merarau sida bebagi tubuh, sekeda sida di asuh berangkut diasuh nganjung ikan ti udah ulih sida bekarang sepagi nya. Tinggal sekeda bala jelu ti berangkutka ikan ngagai langkau palan sida, bala jelu ke bukai lalu bekarang baru.
Kira hari nyau tenggan ngalih dia Tekura seduai Pelanduk ninga munyi puchuk kayu munyi ti dipangka ka kabut, lalu enda lama udah nya seduai ninga munyi nyawa orang, ku iya “ Ha! Ha! Ha!, Indai Lagum nadai dia udah mansai Sungai Kara, iya ke dulu aku empa iya ke dudi aku ema, lagi asai seduai deh!”
Nyadi maya nya Tekura seduai Pelanduk benung kiruh nyendiaka wi rutan dikena seduai deka munuh Antu Raya.
“Nya iya datai Sambe’ mansang kitu iya,” pia ku Tekura, pala iya lau pansut ari kerubung sereta gining-gining malik ke kiba-kanan. Pelanduk tak baka ke enda ibuh.
Enda lama udah nya peda seduai datai Antu Raya lalu enda chamang-chmang lalu terus nuju para salai sereta terus makai salai ke mayuh udah mansau di salai semalam-malam nya.
“Empa dia meh salai Aki”, ku Pelanduk, “kami duai Sambe’ tu apin meh makai pagi tu, agi kiruh deka nyimpai pala kami duai, laban langgit deka runtuh lagi”.
“Oh, pia uchu”, ku Antu Raya, “enti pia pala aku dulu simpai seduai, lagi udah tembu enggi aku, baru seduai nyimpai pala seduai empu.”
“Au sebarang iya meh Aki, pala nuan tau meh dulu disimpai kami duai Sambe’, tang beduruk kitai, udah tembu enggi nuan, nya baru nuan nyimpai pala kami duai Sambe’ ga Aki, alau gali nuan,”ku Tekura.
Antu Raya lalu ngalika diri ba tanah ngimbai langkau palan bala jelu. Udah iya gali nya baru Pelanduk lalu masukka sengkilung wi rutan ti udah disediaka seduai iya Tekura. Udah tembu iya masukka simpai wi rutan ba pala Antu Raya iya lalu masukka pasak kayu semak pending Antu Raya sepiak-sepiak. Tekura seduai Pelanduk lalu sama nantaika pemalu kayu deka dikena seduai malu pasak ti udah sedia diselitka ba simpai pala Antu Raya.
“Tatka lagi Aki, kami duai Sambe’ malu pasak, awakka simpat tu serekat serta ulih nanka pala nuan, nya baru pala nuan enda pechah ditinggang langgit runtuh lagi”, pia ku Pelanduk.
“Au meh, uchu, tak sebarang ku seduai ngaduka simpai pala aku dia meh”, ku Antu Raya.
Kaki enggau jari Antu Raya lalu diperekas Pelanduk sedaui Tekura ngena wi rutan ga.
Nama deka gaga enda ati Tekura seduai Pelanduk ninga jaku Antu Raya munyi nya, terubah sedaui malu pasak ti bap ala Antu Raya nya semina begadai-gadai, Antu Raya mega nadai bemunyi laban nadai tentu berasai pedis.
“Tu tatka Aki, kami duai Sambe’ malu pasak tu uduka agi”, ku Tekura. “Bah Sambe’, itung 1,2,3 tua sereta malu pasak nya, awakka simpai pala Aki tu sama bla terit ari sepiak-sepiak.” Antu Raya enda nyaut.
Tekura seduai Pelanduk sama ngedar nantaika pemalu bait ti bulih mesai kisar deka malu pala Antu Raya ba senentang bubun aji iya.
“Bah, 1, 2, 3”, ku Pelanduk, palu seduai pan sama sereta terengkah bap ala Antu Raya ba senentang bubun aji iya. Antu Raya lalu nyerauh, nyau berauh kampong laban nyawa Antu Raya ti engkakai.
“Bah Sambe’ palu baru, 1,2,3 ku Tekura”. Pemalu bait seduai iya sama sereta terengkah ba sentang bubun aji Antu Raya. Antu Raya pan nyerauh ingar agi, auh nyawa iya nyau munyi guntur dini hari dalam, bala jelu ti benung bekarang nyau tekenyit ninga auh nyawa Antu Raya, tang sida enda nemu utai ti bemunyi nya. Nama deh mati meh Antu Raya, bangkai iya lalu ditudung Tekura seduai Pelanduk ngena daun biru’, awakka bisi dipeda bala jelu ti pulai bekarang, tang pasak kayu enggau pemalu bait udah dilalaika seduai ke dalam babas, awakka bala jelu enda nemu akal seduai ti munuh Antu Ray.
Nyau lemai hari nya baru bala jelu pulai bekarang lalu lebuh sida datai ba langkau palan sida, sida tekenyit bendar meda utai ti ditudung ngena daun nyau baka munggu semak langkau. Bisi sekeda nya ngumbai tuggung ikan ti udah rangkai di salai.
“Nama utai ti ditudung seduai ngena daun nya, Sambe’ ?” pia ku Beruang. Mayuh endar ikan ti udah disalai seduai!”
Pelanduk seduai Tekura enda nyaut seleka mukut enda malas seleka beras. Datai Gajah tak enda chamang-chamang lalu nyilakka ka daun ti dikena nudung bangkai Antu Raya. Sereta iya meda nya bangkai Antu Raya, iya lalu tekenyit sereta tedadang lalu surut terus telentang ranggak-ranggak tegali ngimbai bangkai Antu Raya nya. Bala jelu bukai bisi ti ketawa, bisi ti ka manjung laban ti tekenyit sereta takut meda bangkai Antu Raya.
“Nadai nya utai dikenakutka agi deh,” ku Pelanduk, “udah mati iya dibunuh kami duai Sambe’ tadi. Peda kaki jari udah ditanchang kami duai, awakka iya parai enda mengkasak, bendar amat kami duai bibat ngelaban iya tadi”.
“Amat kering seduai Sambe’ ”, pia ku Rimau, tak nadai sangka mimit aku ka pengering seduai, meda kaki Sambe’ Pelanduk nya tak chungkir pengirau danau, Sambe Tekura nya bekenya ga semina ringkap-ringkap ngema terabai dikena ngayau”.
“Nya meh baka jamah kami duai Sambe’ enti udah ngeransi,” pia ku saut tudah Tekura, tak sama-sama mantaika enserun kami duai Sambe’ Pelanduk, udah nya iya lalu mantaika ajat bunuh, ngingatka ajat bunuh lebuh terantang begau Burung Tekalau, ti nerantangka daun terentang labuh. Aku bekenya nya lalu mantaika langkah pencha silat ulih iya ti beguru ba Datu Nuga nya tuai ke mantap bena’ pala pasang”. Ninga jaku puji Tekura munyi, dia Pelanduk lalu nantaika duku lalu nyapai daun biru’ lalu mantaika ajat bunuh ba mua bala jelu.
“Eh!, umbas meh nya Sambe’ ngajat, lagi udah badu kitai makai lemai, nuan ngajat baru, dikena merindang lemai nganti mata kitai ti deka tinduk”, ku Engkuli’, iya lalu engkechit ngagai dan kayu kempas ti semak dia, lalu gali natka diri nganti bala tukang masak ti mai makai lemai.
Endang baka lemai bukai, bala jelu kiruh besalai enggau bekasamka ikan, mansau asi enggau laluk, bala tukang masak lalu berenahka pemakai sereta branganggai bekumbai makai, indah enda munyi kebaran kaban matai ti nganggau ngumbai antu buyu’ temawai beumpanka piring penganan champur rendai taju gendai kebelian bekumbai da maligai tiang pancha.
Udah badu makai lemai nya, dia Pelanduk lalu bejaku enggau bala jelu ku iya, “ nyadi ikan ulih kitai nubai tu udah mayuh, umbas pemayuh dibai kitai pulai. Nyadi tumu pagi pagila udah tembu kitai bebagi ikan, kitai mulaika diri ngagai menua diri”.
Pagi nya, tumu bala jelu dani, udah tembu sida bekemaska perengka diri, sida lalu nasa daun sida nugungka salai enggau pekasam ti deka dibagi sida.
Nyadi ku Beruang, aku magi salai enggau pekasam ikan, laban kitai tu beguai deka pulai. Nyadi atur bebagi nya beketu, tu dikumbai atur bebagi “besai kelikai lalu mit kelikit”. Reti nya kitai ti besai gamal laban mayuh agi ngema ikan pulai bekarang, mayuh agi ga bagi, nyadi bala kita ti mit laban ngema ikan mimit lebuh pulai bekarang, mimit ga untung.” Bala mayuh nadai bemunyi, laban takut ninga nyawa iya ti bejaku nya nyau raap-raap, tang bala jelu besai gaga ninga atur bagi munyi, sida mit lebih agi Pelanduk seduai Tekura pedis ati enda bemunyi, ngasaika diri diakal bala jelu ti besai gamal.
Udah tembu bebagi, bala jelu lalu mantaika dalam perau semua perengka enggau salai enggau pekasam ikan ti bagi sida siku-siku. Udah tembu sida bebantai, sida lalu ngaduka layar, apin lama sida udah belayar ngejangka nanga Sungai Ketunggau, dia semua jelu nyau bekejerut bekuruh tinduk, semina Tekura seduai Pelanduk ti nyadi jeragan enda tinduk. Lebuh semua jelu bukai ti tinduk nya, dia Pelanduk ti jadi jeragan ngemudika perau pelayar sida, lalu Tekura ngumpul semua empesut ikan pekasam sida. Empesut ikan nya ditampalka iya ba mata semua jelu ti benung jenak tinduk, udah semua mata jelu ditampal iya ngena empesut ikan, Tekura lalu ngengkahka tempurung ba ruang perau sida.
“Bah, Sambe’ tua ngelinggang perau tu”, ku Tekura nganggauka Pelanduk.
Pelanduk sedauai Tekura lalu ngelinggang perau sereta rauh-rauh madahka perau sida deka karam. “ Dani! Dani! Karam kitai tu, balat enda gelumbang!”, pia ku Pelanduk seduai Tekura.
Tekenyit bala jelu ti benung tinduk lalu ensugau, dipenchelakka sida mata, ensepi mata diri enggai nyadi enchelak, Pelanduk seduai Tekura bala agi ga ngelinggang perau sida. Bala jelu ti teguran nya lalu terejunka ai magang-magang. Nama deh penyadi, tang semua sida ulih nyemeraika tebing magang, nadai siku sida lemas.
